கண் நீர் அழுத்தத்தை முழுமையாகக் குணப்படுத்த முடியாது. ஆனால் சிகிச்சைக்கு வரும்போது இருந்த பார்வையைத் தக்க வைக்க இயலும். பார்வையிழப்பு ஏற்பட்டிருந்தால் அதை சிகிச்சையால் சரிசெய்து இழந்த பார்வையைப் பெற இயலாது. இதனால் தான் ஆரம்ப நிலையிலேயே சிகிச்சை மேற்கொள்வது அவசியம் என அறிவுறுத்தப்படுகிறது. கண்களைப் பரிசோதித்த பிறகு கண் மருத்துவர், நோயின் தீவிரத்தைப் பொறுத்து தேவையான சிகிச்சை முறைகளை ஆலோசனை செய்வார்.
கண் நீர் அழுத்த நோயினைக் கட்டுப்படுத்தத் தேவையான சிகிச்சைகள்:
- கண் சொட்டுமருந்து
- லேசர் சிகிச்சை
- அறுவை சிகிச்சை
நோயால் பாதிக்கப்பட்டவர்களில் பெரும்பாலானோருக்கு வாழ்நாள் முழுவதும் கண் நீர் அழுத்தத்தைக் கட்டுப்பாட்டில் வைத்திருப்பது அவசியம். மருத்துவர் பரிந்துரைக்கும் சிகிச்சை முறைகளைத் தவறாமல் பின்பற்றவும்.
சொட்டு மருந்து:
பெரும்பாலான நோயாளிகளுக்கு கண் நீர் அழுத்தத்தைக் கட்டுப்படுத்தும் அல்லது கண்களில் உருவாகும் திரவத்தின் அளவைக் குறைக்கும் கண் சொட்டு மருந்துகளே சிகிச்சையாக அளிக்கப்படுகிறது. கண் அழுத்தத்தைக் குறைக்க, இவை பயன்படுகின்றன. கண் நீர் அழுத்த சொட்டு மருந்துகளில் பல வகைகள் உள்ளன. சிலருக்கு ஒன்றுக்கு மேற்பட்ட கண் நீர் அழுத்த சொட்டு மருந்துகள் வழங்கப்படும்.
பக்க விளைவுகள்:
சிலருக்கு கண்களில் எரிச்சல், வீக்கம், அரிப்பு போன்றவை ஏற்படும். வெகு சிலருக்கு இதயத்துடிப்பு, இயல்பைவிட அதிகமாக இருக்கும்.
குறிப்பு: ஆஸ்துமா பாதிப்பு உள்ள நோயாளிகள் மருத்துவரிடம் கண்டிப்பாக அதைத் தெரிவிக்க வேண்டும். ஏனெனில் சில கண் நீர் அழுத்த சொட்டு மருந்துகளை ஆஸ்துமா நோயாளிகள் பயன்படுத்தக் கூடாது. இதற்கான மாற்று மருந்துகளை கண் மருத்துவர் வழங்குவார்.
எவ்வாறு செயல்படும்:
கண்களில் சுரக்கும் திரவத்தைக் குறைத்து கண் அழுத்தத்தை சொட்டு மருந்துகள் குறைக்கின்றன அல்லது கண்களிலிருந்து திரவம் வெளியேறும் துளைகளைமேம்படுத்துகின்றன/அதிகரிக்கின்றன. இதனால் கண்களிலிருந்து திரவம் இயல்பாக, சிக்கலின்றி வெளியேறும்.
பக்க விளைவுகள்:
சிலருக்கு கண்களில் எரிச்சல், வீக்கம், அரிப்பு போன்றவை ஏற்படும். வெகு சிலருக்கு இதயத்துடிப்பு, இயல்பைவிட அதிகமாக இருக்கும்.
அடிக்கடி கேட்கப்படும் கேள்விகள்
-
எத்தனை நாட்கள் சிகிச்சையைத் தொடர வேண்டும்?
எதிர்காலத்தில் பார்வையிழப்பு ஏற்படாமல் இருக்க, வாழ்நாள் முழுவதும் கண் நீர் அழுத்தத்திற்கான மருந்துகளை எடுத்துக்கொள்ள வேண்டும். மருத்துவர் குறிப்பிட்டால் மட்டுமே மருந்துகளை நிறுத்த வேண்டும்.
-
2-3 வாரங்களுக்கு மருந்துகளை நான் பயன்படுத்தவில்லை என்றாலும் எனது பார்வையில் மாற்றம் இல்லை. ஏன் மருந்துகளைத் தொடர வேண்டும்?
கண் நீர் அழுத்த நோயால் பார்வை நரம்பானது படிப்படியாகத்தான் பாதிக்கப்படும். மருந்துகளை பயன்படுத்தவில்லை என்றாலும் பார்வையில் மாற்றங்கள் இருக்கும். அதை உங்களால் உணர முடியாமல் இருக்கலாம். மருந்துகளைத் தொடர்ந்து பயன்படுத்துவதன் மூலமே பார்வை நரம்பையும் பார்வையையும் பாதுகாக்க முடியும்.
-
பல வருடங்களாக கண் நீர் அழுத்தத்திற்கு மருந்துகளைப் பயன்படுத்தி வருகிறேன். ஆனால் பார்வையில் முன்னேற்றம் இல்லை. ஏன்?
பார்வை நரம்பு பாதிப்பால் பார்வையில் குறைபாடோ பாதிப்போ ஏற்பட்டால் இழந்த பார்வைத் திறனை மீண்டும் பெற முடியாது. மேற்கொண்டு பார்வை இழப்பு ஏற்படாமல் இருக்கவே மருந்துகளைத் தொடர்ந்து பயன்படுத்த வேண்டும்.
-
சொட்டு மருந்தால் பார்வையிழப்பை குணப்படுத்த முடியுமா?
இல்லை. கண் நீர் அழுத்தத்திற்கான சொட்டு மருந்துகளால் பார்வையிழப்பை குணப்படுத்த முடியாது. கண்களில் உள்ள அழுத்தத்தைக் குறைக்கவே சொட்டு மருந்துகள் பயன்படுத்தப்படுகின்றன.
-
எனது குடும்பத்தில் உள்ள மற்றவர்களுக்கும் கண் நீர் அழுத்தம் உள்ளது. எனது மருந்தை அவரும் பயன்படுத்த முடியுமா?
கூடாது. அவரை கண் மருத்துவரிடம் பரிசோதனை செய்து மருத்துவர் பரிந்துரைக்கும் மருந்துகளையே பயன்படுத்த வேண்டும்.
-
ஃபிரிட்ஜில் சொட்டு மருந்துகளை வைக்க வேண்டும் என மருந்துக் கடையில் கூறினார்கள். என்னிடம் ஃபிரிட்ஜ் இல்லை என்ன செய்வது?
சில சொட்டு மருந்துகளை குளிர்ச்சியான தட்பவெப்ப நிலையில் வைக்க வேண்டும். அதனால் அவ்வாறு கூறியிருப்பார்கள். உங்களிடம் ஃபிரிட்ஜ் இல்லை எனில் மருத்துவரிடம் தெரிவிக்கவும். மாற்று மருந்துகளை மருத்துவர் பரிந்துரைப்பார்.
-
மருத்துவர் பரிந்துரைத்த நேரங்களில் சொட்டு மருந்துகளைப் போட்டுக்கொள்ள மறந்துவிடுகிறேன். இதில் சிக்கல் உள்ளதா?
முடிந்தவரை மருத்துவர் குறிப்பிடும் நேரங்களில் சொட்டு மருந்துகளைப் போட்டுக் கொள்ளவும். உங்கள் குடும்ப உறுப்பினர்களிடம் அலுவலக நண்பர்களிடம் கூறி உங்களை நினைவுப்படுத்த சொல்லவும். நினைவூட்ட, உங்கள் அலைபேசியிலேயே அலாரம் வைத்துக்கொள்ளவும்.
