தேனி -அரவிந்தில் ஊரடங்கு நாட்களின் செயல்பாடுகள்

தமிழகத்தில் கொரோனா நோயால் பாதிக்கப்பட்ட மாவட்டங்களில் தேனியும் ஒன்று. பொதுவாக, ஒரு நாளைக்கு தேனி-அரவிந்திற்கு 350 வெளிநோயாளிகள் பரிசோதனைக்கு வருவர். ஊரடங்கு காலத்தில், அவசர கண் சிகிச்சைகள் மட்டுமே வழங்கப்பட்ட நிலையில், சராசரியாக ஒரு நாளைக்கு 150 நோயாளிகள் மட்டுமே மருத்துவமனைக்கு வந்தனர்.

அரவிந்தின் மற்ற கிளைகளைப் போல, தேனி-அரவிந்திலும் நோயாளிகள் மற்றும் பணியாளர்களின் பாதுகாப்பு மற்றும் உடல்நலனில் தீவிர கவனம் செலுத்தப்பட்டது.  நோயாளிகளிடம் சமூக இடைவெளியின் முக்கியத்துவம் தீவிரமாக வலியுறுத்தப்பட்டது.  சோப் நீர் உள்ள பாட்டிலை கைகளால் அழுத்தி, பயன்படுத்துவதைத் தவிர்க்க, கால்களால் அழுத்தும் சாதனங்கள்,(dispensers) இருக்கும் பொருட்களைக் கொண்டு பணியாளர்களால் உருவாக்கப்பட்டன. அவை, மருத்துவர்களின் விடுதியிலும் மருத்துவமனை நுழைவாயிலிலும் வைக்கப்பட்டன. நோயாளிகள், மருத்துவமனைக்கு நுழையும்போதே அவர்களின் சமீபத்திய பயண விவரங்கள் கேட்டு அறியப்படுவதுடன் உடல் வெப்ப நிலையும் பரிசோதிக்கப்படுகிறது. அவர்களின் கண் சிக்கலைப் பொறுத்து உரிய கிளினிக்குகளுக்கு அனுப்பப்படுகின்றனர். மருத்துவமனை கிளினிக்கிற்குள் கூட்டம் சேர்வதைத் தவிர்க்க, டோக்கன் முறை பின்பற்றப்படுகிறது.  இதனால் குறிப்பிட்ட எண்ணிக்கையில் மட்டுமே நோயாளிகள் கிளினிக்கினுள் இருப்பர். சமூக இடைவெளியும் முறையாகப் பின்பற்றப்படுகிறது. துணைக்கு வந்துள்ளவர்களை பரிசோதனை பகுதிகளுக்கு அனுமதிக்கப்படுவதில்லை. மாற்றாக, மருத்துவமனை நுழைவாயிலுக்கு அருகில் பந்தல் அமைக்கப்பட்டு அங்கே அவர்கள் காத்திருக்க, இடவசதி ஏற்பாடு செய்யப்பட்டுள்ளது. அனைத்து பாதுகாப்பு நெறிமுறைகளையும் பின்பற்றி, குறைமாதத்தில் பிறந்த குழந்தைகளுக்கு விழித்திரை பரிசோதனை செய்யப்படுகின்றன.

பணியாளர்கள் அனைவருக்கும் முகமூடி (mask), கையுறை ஆகியவை வழங்கப்பட்டுள்ளன. நோயாளிகளைப் பரிசோதிக்கும் பணியாளர்களுக்கு முகக்கவசம் (face shield), தொப்பி ஆகியவை வழங்கப்பட்டுள்ளன. பற்றாக்குறையை சமாளிக்க, பயன்படுத்திய முகமூடிகள் அனைத்தும் புறஊதா கதிர்கள் மூலம் தூய்மைப்படுத்தப்படுகின்றன. அலமாரி ஒன்றில் புறஊதா கதிர்களை வெளிப்படுத்தும் மின் விளக்குகள் பொருத்தப்பட்டுள்ளன. ஒரே நேரத்தில் பயன்படுத்திய 40 முகமூடிகளை அலமாரி உள்ளே ஒரு மணி நேரம் வைத்து, புறஊதா ஒளியில் நோய்த் தொற்று இல்லாமல் தூய்மைப்படுத்தப்படுகின்றன. அலமாரி தானாகத் திறந்துகொண்டால் உள்ளே உள்ள புறஊதா மின் விளக்கு அணைந்துவிடும் வகையில், தானியங்கி (automatic) ஸ்விட்ச் பொருத்தப்பட்டுள்ளது.

பிளாஸ்டிக் பாட்டில் மூடியின் உள்பக்கத்தில் Formalin Hydrogen Peroxide எனும் வேதி திரவம் தடவப்பட்ட துணி வைக்கப்பட்டுள்ளது. நோயாளிகளிடமிருந்து பெறப்படும் பணமானது இதில் போடப்படுகிறது. பின்னர், அந்த பணம் வங்கியில் செலுத்தப்படுகிறது. நோய்த் தொற்றை நீக்கும் Formalin திரவம் உள்ள பெட்டியில் பணத்தைப் போடுவதால் ரூபாய்த் தாள்களின் மூலம் நோய்த் தொற்று பரவுவது தவிர்க்கப்படுகிறது.

நோயாளிகளைப் பரிசோதிக்க, சுழற்சி முறையில் மருத்துவர்கள் பணியாற்றுகின்றனர். காலை 7.30 முதல் 1.30 வரை ஒரு குழுவும், மதியம் 1.30 முதல் 4.30 வரை மற்றொரு குழுவும் செயல்படுகிறது.